خطوات لازم تقوم بيها قبل ما توصل لمرحلة فقد الأمل ومحاولة البقاء على قيد الحياة في الصحراء
- لازم تكون معرف حد خط سيرك في رحلتك وعارفين التوقيت اللي هتطلع فيه؛ لأن دول اللي هيبلغوا على طول بغيابك وهيحسوا انك توهت وهيتصرفوا.
- خليك مؤمن انك هترجع وحافظ على هدوءك.
- الأفضل انك تقف مكانك ومتمشيش؛ لأنك مش عارف الاتجاهات لو مشيت فى أى اتجاه وانت بتفكر هتبعد أكتر، حاول تقعد في أقرب مكان آمن وتحافظ على هدوءك.
- حاول تفكر خارج إطار انك توهت، المطلوب فقط انك ترجع لأقرب نقطة جبل أو أى مكان مريت بيه وعارفه، وده المفترض أقرب مسافة هترجعها.
- لو الليل هيبدأ وهتكون في الضلمة أو فى خطر من الطقس، أبنى ملجأ بدائي قريب من مكانك يحميك ودي أهم نقطة.
- لو تعرف تولع نار اعمل كده والهدف من ده شعورك بالآمان، وممكن تحط فيها أوراق شجر أو فروع مش جافة لزيادة الدخان عشان لو حد بيدور عليك يعرف مكانك، وممكن تستخدمها لغلي المياه وتعقيمها.
- والأفضل انك تفضل مكانك ومتتحركش وتحافظ على حالتك وتتجنب الجفاف من قله المية وتتجنب حرارة الشمس أو البروده بالليل، وتغطي جسمك كويس.
في حالة عدم بحث أي شخص عنك أو رجوعه ليك فكر في الآتي
- علّم مكانك الحالي كأنه قاعده جديدة موقتة، ممكن بالأحجار أو الصخور أو عصاية كبيرة تغرسها في الرمل، وتكون ظاهرة من على بعد إذا أمكن.
- حاول تفتكر كل النقط أو المعالم اللى مريت بيها ،منين بدأت، كنت متجه فين، كام تقريباً المسافة اللى قطعتها فى الوقت ده.
- حاول تعرف الإتجاهات الأساسية وممكن ترسمها على الارض جنب مكانك في القاعدة الجديدة، طبعاً الشمس بتطلع من الشرق وبتكون فى أعلى السماء ناحية الجنوب وقت الظهر وتغرب فى الغرب.
- لو ماعرفتش تحدد الاتجاهات الأساسية ممكن تحدد اتجاهات تانية زي يمين مكانك، شمال مكانك، امام مكانك، خلف مكانك.
- قبل ما تتحرك بعد فترة انتظار طويلة، سيب علامات استغاثة فى مكانك الحالى، وارسم أسهم توضح أول نقطة هتتحرك ليها، عشان تسهل معرفه مسارك.
- ممكن تخفف شنطك فى مكان القاعدة وتتحرك باقل الاحتياجات اللي تكفيك للعودة.
- حاول تعرف دايماً ترجع من النقط الى حددتها لمكانك.
- النقط التى تحددها حاول تكون علامات انت مريت بيها زي مبنى معين أو وادى محدد ،وكمان طبيعة أرض انت فاكرها.
دايماً الأولوية لعدم التحرك والمحافظة عليك عشان تلاقيك فرق البحث، والمطلوب هو حماية نفسك من أخطار الحر والبرد وعدم الجفاف وغيرة ف الفترة دي عشان تكون في آمان وتحافظ على نفسك.