10 نصائح ضرورية لرحلة سعيدة وممتعة
- حدد النشاط اللي بتحب تمارسه وبناء عليه أختار الموقع المناسب ليه،
زي مثلاً لو بتحب السباحة روح مكان فيه بحر لو بتحب التسلق روح جبال .. لكل مكان نشاطاته وطريقة استعداد خاصة بيه. - الحشرات من الضيوف اللي قادرة تفسد متعتك بأي رحلة، عشان كده متخيمش قريب من أماكن فيها زرع او عيون مائية او أحراش
لانها بتجذب الحشرات وبلاش كمان تبقى تحت شجر عشان ممكن الاغصان تقع عليك. - جمع كل المعلومات اللي تقدر عليها عن المكان اللي انت رايحه عشان تقدر تحقق أقصى استفادة من المكان وكمان تتفادى اي مخاطر ممكن تحصلك.
- لو رايح مكان فيه تقاليد وثقافة مختلفة عنك، أقرأ عنهم كويس عشان تقدر تتأقلم معاهم بسرعة والموضوع ميبقاش صادم ليك
ومهما كنت مش متفق مع تقاليدهم افتكر كويس إنك انت اللي ضيف عليهم وهم أصحاب المكان ف خليك ضيف خفيف. - متنساش تعرف كمان حالة الطقس هناك عاملة ازاي صبح وليل عشان تقدر تاخد معاك هدوم مناسبة ومتبقاش متكدر.
- مش مهم تبقى على سنجة عشرة، المهم تبقى مرتاح..
عشان كده لازم تاخد معاك أكتر هدوم مريحة عندك ومتنساش يبقى معاك كوتش مريح وخد واحد تاني احتياطي. - متنصبش خيمتك في أي أماكن منحدرة او معرضة للانهيار او عُرضة للسيول.
- وانت بتختار الخيمة والمنامة اتأكد انهم مناسبين لجو المكان اللي انت رايحه.
- متستهرش بصندوق الإسعافات الأولية لأن وجوده ضروري معاك، انت مش ضامن اي حاجة غير متوقعة تحصل.
- أعمل تصور مبدئي لميزانية الرحلة وقرر هتبقى مناسبة ليك ولا لا، وخد فلوس زيادة معاك احتياطي.
طبعاً النصائح بتختلف حسب نوع رحلتك ومكانها، وفي النهاية بنتمنالك رحلة سعيدة وممتعة.