أهم الحاجات اللي لازم تفكر فيها، وأنت بتخطط لتسلق الجبال
معرفتك لأسم الجبل اللى هتعمل عليه هايكنج مش كفاية، لازم تكون مخطط كويس اوى للنقط اللى جيه دى.
هدفك ايه من تسلق الجبال؟
الطلعة اللى من غير هدف مالهاش طعم، لازم يكون عندك هدف سواء بقى بتتحدى نفسك أو طالع تصور مناظر طبيعية أو حتى طالع تلعب ضغط على القمة المهم لازم يكون فى هدف واضح ليك.
الجو ظروفه ايه!
هدفك مش هتحققه لو مش عارف طقس الجبل اللى انت هتطلعه، ومش بنتكلم بس على كونه حر ولا برد الموضوع فى تفاصيل اكتر من كده هنتكلم عنها فى مقالة تانية بالتفصيل.
التوقيت امتى!
يعنى صيف ولا شتاء بليل ولا بالنهار، معرفة التوقيت هتساعدك جدا فى الوصول للقمة والحفاظ على حياتك، وده لأن ال climbing mountains مثلا طلوعها فى الشتاء هيبقى أشبه بمهمة انتحارية، لأن نهار الشتاء قصير وتقلباته الجوية شديدة وسريعة يبقى الجبال اللى من النوع ده هتقدر تقرر اذا كنت هتطلعها ولا لأ لو مدرك أهمية اختيار التوقيت الصح وانت بتخطط لرحلتك.
نوع الجبل ايه!
يعنى trail mountain ولا scrambling mountain ولا climb mountain واحنا كتبنا عن أنواع الجبال فى مصر فى المقال ده.
نوع الهايك ايه!
لازم تبقى محدد كويس اوى تفاصيل الهايكنج بتاعك، يعنى المسافة هتكون طويلة ولا قصيرة، وزن الشنطة هيكون كبير ولا هتطلع خفيف خفيف، طب يا ترى هيبقى فى جمل يشيل الشنطة بتاعتك ولا هتمشى بيها كل دى أسئلة لازم تكون عارف ليها إجابة وانت بتحضر لرحلتك.
خبرة التيم اللى معاك.
تخيل نفسك واحد مبتدئ طالع مع ناس محترفة جبل صعب النتيجة الطبيعية إنك هتتمنى اليوم اللى قررت تطلع فيه هايكنج يكون أخر يوم فى عمرك، وده لأنه مينفعش تطلع مع تيم مش شبهك لو انت محترف هتضايق ولو انت مبتدئ هتتعب ومش هتقدر عليهم عشان كده لازم تعرف خبرة اللى طالعين معاك كويس اوى.
وبكده احنا عرفنا ازاى تخطط لرحلتك للجبل بطريقة فعالة.