أنواع الأكل في الصحراء

زي أي رحلة بنطلعها بنبقى مهتمين هناخد معانا أكل ايه، بس رحلات الهايكينج غير أي رحلة لانك بتختار أكلات مناسبة لجو الصحراء ونشاطاتك هناك فبيتحكم في أكلك عوامل كتير.

عوامل اختيار نوع الأكل في الصحراء

• الموسم الي انت مسافر فيه ودرجة الحرارة
• المدة اللي هتقعدها
• الأنشطة الي هتمارسها

أنواع الأكل الأنسب بالتفصيل

1. الجبن

   الجبنة أساسية في حياتنا اليومية وخصوصاً في الرحلات لكن مينفعش تاخد معاك أي نوع جبنة
   لازم جبنة متكونش نباتية الدهن وبتتحمل الحرارة ومبتتباعش في كوبايات عشان الوزن
   وده كله هتلاقيه في الجبنة الشيدر الطبيعية ومتقطعة مكعبات لأنها فيها دهون
   وبالتالى بتساعد على الإحساس بالدفء وكمان بتدى طاقة كبيرة مقارنة بوزنها.

2. العدس

   سواء بجبة أو أصفر وبيكون مناسب جداً لو انت مسافر في الشتاء عشان بيزود إحساسك بالدفء
   غير انه بيديك طاقة وبيشبع وطبعاً مفيش جدال على فايدته، مشكلته الوحيدة انه بيحتاح نار ومية للطهي.
   ممكن نجيب كمية فى حدود 100 جرام أو أقل من العدس بجبة أو الأصفر هتبقى كافية جدا لوجبتين مشبعين.
   موجود فى الماركت أكياس عدس أصفر بودرة ماركة كينور جاهز بيحتاج ماء مغلي بس.

3. البروتين النباتى والبقوليات

   زي الفاصولياء البيضاء واللوبيا ولكن بيعيبهم إنهم محتاجين فترة طهي طويلة

   فبالتالي هتحتاج مية ونار لفترة مش قليلة عشان يبقى الأكل طري وتقدر تاكله.

4. الخضروات

   خليك دايما فى الحاجات الناشفة عشان متتبهدلش معاك وتبهدلك زى (البطاطس / البطاطا / البصل / الجزر / الخيار /باذنجان /فلفل أخضر / فلفل ألوان)
   – البطاطس والبطاطا مصدر مهم جداً للكاربوهيدرات والطاقة ومحتاجة نار متوسطة أو هادية وليه طرق طهى مختلفة وأهمها السلق والشوى ونسبة مخلفاتهم شبه معدومة.
   – البصل مينفعش يبقى وجبة لوحده بس ينفع يبقى شوربة لو مسلوق او مشوي.
   – الجزر بيتميز انه ممكن يتاكل نيء او مشوى او مسلوق وملوش أى مخلفات او بواقي.
   – الخيار ميزته انه مرطب طبيعى ومليان ميا فبيقلل من الشعور بالعطش والجوع ومبيحتاجش تحضير كمان ممكن تستعمل قشرته كملطف ضد الحروق خاصة حروق الشمس.
   – الباذنجان هيديك طاقة وممكن يتاكل مشوى او مسلوق او طاجن او مشوى ومهروس يعيبه مخلفاته (القشر)
   – الفلفل ممكن يتاكل ني او مسلوق او مشوى ويعيبه مخلفاته ممكن توصل لنص وزنه حسب صنف الفلفل غير انه سريع التلف كمان.

5. الفواكه

   الفواكه عامة بتنقسم لأكتر من عيلة أهمها بالنسبة لينا نوعين (الخشبيات والحمضيات)
   – الخشبيات زى التفاح والكمثرى ودول زى ما إسمهم بيقول ناشفين وعمرهم أطول من انواع تانية كتير وكمان فيهم نسبة أملاح و سكريات وسوائل مطلوبة وكمان ألياف. ممكن كمان تاخد جوافة او أناناس.
   – الحمضيات أهمهم البرتقال مصدر سوائل فوق الممتاز ومفيد فى حالات العطش الشديد طبعاً وبيحتوي على نسب ألياف عالية وأملاح.
   – الموز مهم جدا عشان بيحتوي على البوتاسيوم وبيكون وجبة أساسية لو انت في رحلة هايكينج لأنه بيسهل المشي وبيقلل اصابتك بأي شد عضلي، لكن عيوبه انه ليه مخلفات ولازم تحافظ عليه وممكن يبوظ لو مجبتش ثمرة مناسبة للرحلة.
   – القراصيا (الفواكه المجففة عموماً مفيدة و عملية جداً)

6. المكسرات
   

   المكسرات طبعاً مهمة ومفيدة ومش بتحتاج تحضير زي: السوداني، اللوز، البندق، عين الجمل، الكاجو

7. وجبات طاقة
   

   أكلات للطاقة وزنها قليل وسهلة التحضير بس تأثيرها قوي وعادة بيكون تأثيرها أعلى من أى بروتين بار..
   عسل نحل مع تمر بدون نوى مع مكسرات (طبعاً مش مملحة) وممكن معاها حبوب لقاح وجنين قمح أو شوفان وفى الحالة دي ممكن تتاكل بالمعلقة مع لبن أو بدون جنين القمح والشوفان وتتاكل ساندوتش ..

8. هتحتاج حاجات تانية زي:
   

   الشوفان / القمح / جنين القمح / طلع النخل / حبوب اللقاح / الزبيب / التين المجفف / زعتر / سكر / لبن بودرة / نعناع أخضر أو ناشف / أكياس عصير تانج / بسكويت مملح/ بقسماط/ عسل نحل.
   البسكويتات المملحة والليمون علاج لأي دوخة ناتجة عن ارهاق المشي الكتير.

طبعاً انت مش هتاخد كل ده معاك لكن هتختار الأكل المناسب ليك ولرحتلك من النقط اللي ذكرناهم…