14 خطوة تنقذ حياتك لو توهت في الصحراء
التوهان في الصحراء مش موقف بسيط… واللي بينجو منه غالبًا مش أقوى واحد، لكن أهدى واحد وبيعرف يتحكم في خوفه ويفكر بعقل. الدراسات دايمًا بتأكد إن أكتر سبب بيعرض الناس للخطر في الصحراء هو الحركة العشوائية… واللي بيمشي من غير خطة بيبعد أكتر، وبيفقد طاقته أسرع.
خطوات لازم تعملها قبل ما توصل لمرحلة فقدان الأمل
1- خلّي حد يعرف خط سيرك وميعاد خروجك وعودتك… دي أول شبكة أمان ليك، لأن أول ما يتأخر رجوعك الناس هتعرف إنك اتوهت وهيبدأوا يتحركوا.
2- حافظ على هدوءك… الخوف بيضيع عليك القدرة على التفكير المنطقي، وده أخطر من التوهان نفسه.
3- الأفضل تقف مكانك ومتتحركش… لأنك مش ضامن الاتجاهات، ومع الحركة العشوائية هتلاقي نفسك بتبعد عن أي فرصة إنقاذ.
4- فكّر بعيد عن فكرة “أنا تايه”… ركّز ترجع لأقرب نقطة انت عديت عليها، جبل، وادي، شجرة، أي حاجة أنت فاكر شكلها.
5- لو الليل قرب أو الجو هيقلب… ابنِ ملجأ بسيط يحميك من البرد أو الرياح. ناس كتير فقدت حياتها بسبب تغيّر الحرارة مش بسبب العطش.
6- لو تعرف تولّع نار، اعمل كده… مش بس للدفا، لكن كمان عشان الدخان يبان من بعيد، وكمان تقدر تعقم المياه لو لقيتها لأن الميه في الصحراء ساعات بتكون ملوّثة بطبيعتها.
7- الأفضل تفضل مكانك وتحافظ على طاقتك… ابعد عن الشمس بالنهار، وغطي جسمك كويس بالليل. الجفاف في الصحراء ممكن يحصل أسرع مما تتوقع.
لو الناس اتأخرت عليك ومحدش وصلك؟!
8- اعمل علامة واضحة في مكانك… بأحجار، عصاية كبيرة، أي حاجة باينة، تبقى القاعدة المؤقتة اللي هترجع لها لو بعدت.
9-افتكر كل نقطة عديت عليها… البداية كانت فين، الاتجاه اللي كنت ماشي فيه، والمسافة التقريبية اللي قطعتها.
10حدد الاتجاهات الأساسية… الشمس تطلع من الشرق وتغيب في الغرب، وأعلى نقطة ليها في السماء بتكون ناحية الجنوب عند الظهر.
12- قبل ما تتحرك، سيب علامات استغاثة… ارسم أسهم توضح أنت رايح فين عشان لو فرقة بحث وصلت تقدر تتتبع خط سيرك.
13- خفّف الشنطة… وسيب الحاجات اللي مش ضرورية عند القاعدة الأساسية، وتحرك بالحاجات اللي هتساعدك ترجع.
14-كل ما تحدد نقطة جديدة، اربطها بنقطة قديمة… التتبع ده هيساعدك متفقدش الاتجاه.
الأولوية دايمًا إنك ماتتحركش غير للضرورة… لأن فرص إن فرق الإنقاذ تلاقيك أكبر بكتير لو فضلت ثابت، وده اللي بتقوله معظم دلائل النجاة في الصحراء.
وفي الآخر… سرّ النجاة الحقيقي في الصحراء هو الهدوء + الحفاظ على الطاقة + التفكير بعقل. لو قدرت تتحكم في الثلاث حاجات دول، فرص رجوعك بتكون أعلى بكتير من اللي بيتوقعه أي حد.
ومتنساش تدخل هنا هتلاقي كل أدوات الطوارئ اللي محتاج تعمل سابك عليها
أقرأ ايضاً:
