بتفكر تتسلق جبل؟! تعالى ندلك على أول الطريق
- فى الفترة الأخيرة ثقافة الهايكنج على الجبال بدأت تتعرف لناس كتير بس يظل السؤال الشائع ابدأ منين!
- عشان كده احنا عملنا سلسلة سنة أولى هايكنج اللى هنعرفك فيها كل حاجة محتاج تعرفها عشان تبدأ رحلتك مع الهايكنج.
- أول حاجة لازم تعرفها إن الجبال أنواع ومفيش جبل شبه التاني، بس احنا هنقولك ازاى تعرف إذا كان الجبل اللى إنت عايز تطلعه مناسب ليك ولا لأ يلا نبدأ.
ال Trails Mountain:
- النوع ده من الجبال يعتبر الأسهل وأى حد عمره ما طلع جبل في حياته يقدر يخوض التجربة دى وهينبسط،
- وده لإن ليه طريق محدد تمشي عليه، وكل الصعوبة اللى فيه أنه بيكون طويل ومحتاج لياقة بدنية كويسة عشان متتعبش اوى أثناء الهايكنج.
- أمثلة على الجبال دى جبل موسى -جبل سانت كاترين – جبل عباس – جبل المناجاة ودول مش هتحتاج غير كوتشى Running ولبس مناسب وتنطلق.
ال Scrambling Mountain:
- لو إنت تخطيت مرحلة ال Trails Mountain وأصبح الموضوع سهل بالنسبالك يبقى ده الوقت المناسب للأنتقال للمستوى الأعلى ال Scrambling Mountain،
- النوع ده من الجبال بيكون فى طريق لكن الطريق غير ممهد وعبارة عن صخور بتتحرك عليها بإستخدام رجلك بس أو أيدك ورجلك عشان كده أتسمى بال Scrambling،
- والنوع ده مينفعش انه يكون تجربه أولى ولازم يكون معاك كوتش هايكنج، ولياقتك البدنية كويسة جدا.
- أمثلة على ال Scrambling Mountain (جبل صفصافة – جبل الأحمر – أم علوى)
ال Climb Mountain:
- الجبال اللى من النوعية دى المحترفين فقط، بسبب صعوبته البالغة ومدى خطورته، وما يتطلبه من تجهيزات وخبرات عالية،
- لإن الجبل مالهوش طريق تماما، وكله عبارة عن صخور بيطلع عليها بأيدك ورجلك بالأضافة لسرعة الرياح وإنحدار الجبل الخطر وكمان طبيعة الجبل اللى بتطلب قدر عالى من الحكمة والخبرة.
- وبكده إنت فهمت أنواع الجبال في مصر، وقدرت تحدد النوع المناسب ليك فى الوقت الحالي
ومتنساش تقرأ باقى سلسلة سنة أولى هايكنج.
أقرأ ايضاً:
