المعلومات دى احنا نقلناها عن المستكشف محمود الجمل “ملك الدروب”.
معلومات تعرفها لأول مرة عن جبل الثبت أحد أعلى 10 قمم جبال مصر
جبل الثبت من جبال سانت كاترين اللي دايمًا ليها رهبة كده، وده لأنه واحد من أعلى القمم في مصر بارتفاع 2400 متر فوق سطح البحر. الجبل صعب فعليًا، انحداره عالي والمسار بتاعه تقيل، بس لحسن الحظ فيه درب واضح بيخليك قادر تمشي عليه حتى لو مفيش رجوم.
إحداثيات قمة الجبل
N28°15’41.38″ E34°00’59.25″
صعوبة الطريق وطريقة الصعود
الطريقة اللي بيتم استخدامها هناك هي Butterfly Ultralight Approach… يعني بتاخد شنطة خفيفة بين 6 و8 كيلو، تطلع بيها للقمة وترجع في نفس اليوم.
مسافة الطلوع حوالي 5 كيلو وبتاخد من 4 لـ7 ساعات حسب لياقتك، ومسافة النزول نفس الـ5 كيلو بس بتاخد من 3 لـ5 ساعات.
المسار نفسه مقسوم تقريبًا لـ 80% مشي بانحدار عالي و20% Scrambling… وده الجزء اللي هتستخدم فيه إيدك ورجلك على الصخور.
تروح لجبل الثبت إزاي؟
الطريق بيبدأ من مدينة سانت كاترين، ومن هناك بتاخد عربية دفع رباعي أو نقل لحد وادي الطرفاء… الرحلة حوالي 3 ساعات لمسافة 32 كم.
بعدها بتبدأ المهمة الجدّ:
من وادي الطرفاء لحد وادي الأقصرية: مسافة 14 كم في حوالي 6 ساعات.
ومن وادي الأقصرية لحد قاعدة الجبل: مسافة 6 كم في حوالي 4 ساعات.
أماكن المياه على الطريق
من حظ جبل الثبت إنه من الجبال اللي فيها مياه بشكل كويس نسبيًا. هتلاقي بير في القاعدة وكذا نقطة مياه في الطريق، ودي أماكنهم:
بير الطرفاء – يبعد 4 كم عن نقطة التحرك
N 28°23’33.50″ E 34°00’38.37″
تجمع مياه (أ) – على بعد 8 كم
N 28°21’06.91″ E 34°00’12.51″
تجمع مياه (ب) – على بعد 9 كم
N28°21’06.91″E34°00’8.46″
تجمع مياه (ج) – على بعد 9.4 كم
N 28°21’01.15″ E 34°00’09.04″
آبار وادي الأقصرية – على بعد 14 كم
N 28°20’01.90″ E 34°00’33.21″
بير أبو عجيلة – قاعدة الجبل – على بعد 20 كم
N 28°15’38.42″ E 34°01’08.61″
أفضل وقت لصعود جبل الثبت
أحسن شهور الصعود هي:
أكتوبر – نوفمبر – ديسمبر – مارس – أبريل
لأن الجو بيكون ثابت ومناسب للحركة الطويلة والانحدارات العالية.
جبل الثبت من الجبال اللي بتديك تجربة صعبة بس ممتعة في نفس الوقت… طريق طويل، مجهود عالي، بس كل خطوة فيه ليها طعم. ومع إن الدرب واضح، الصعود ممنوع بدون دليل من قبيلة الجبالية أو أولاد سعيد اللي هما أكتر ناس فاهمة المنطقة ودروبها.
رحلة تستحق كل دقيقة فيها… بس محتاجة استعداد واحترام للجبل.
أقرأ ايضاً:
