أفضل 15 مكان تخييم في مصر
جربت قبل كده تطلع بره زحمة المدينة وتروح مكان تسمع فيه صوت الهدوء.
مصر مليانة أماكن هادية ورايقة، ومش عايزة غير خيمة وتنطلق، وفى السطور القادمة احنا هنقولك على احلى 15 مكان مناسب للتخييم في مصر.
البحر الأحمر
- البحر الأحمر غنى جدا بالأماكن المناسبة للتخييم، وهنبدأ بمدينة البساطة دهب.
دهب:
- الفترة الأخيرة الناس أصبحت تتردد عليها في المواسم، ولكن مش كتير يعرف إنه ممكن يروح يخيم فى أحد الكامبات هناك سواء بخيمته؛
- أو عن طريق الخيام المتوفرة في الكامب، وأفضل وقت تروح فيه دهب بعيدا عن الزحمة من أكتوبر لحد ديسمبر ومن أواخر فبراير لحد أبريل.
أبو جالوم:
- محمية طبيعية موجودة بين دهب ونويبع، ووسيلة الوصول ليها هى مركب من البلوهول فى دهب لأبوجالوم، وهناك هتقدر تخيم حرفيا على البحر مباشرة.
البلولاجون:
- البلولاجون هو مكان توصله بعربية من ابو جالوم، وهناك من سحر لون المياه ونقاء البحر هتحس إن روحك بترفرف من الجمال،
- وهناك ممكن تعيش فى خوشة ودى غرفة من الخوص على البحر، أو ممكن تخيم بالخيمة بتاعتك.
القلعان:
- كنز مخفي فى مرسى علم كتير من الناس ميعرفوش أنك ممكن تاخد خيمتك، وتخيم في القلعان اللي بتسمى مالديف مصر.
طندبة:
- من الأماكن المخفية في مرسى علم هى طندبة، واللى متعرفوش إنك هناك ممكن تنزل فى كامبات على البحر مباشرة سواء بخيمتك؛
- أو إنك تأجر خيمة من هناك بأسعار معقولة جدا، ومن هناك ممكن تتمشى لمنطقة النيزك على بعد 3كم من الكامبات هناك.
رأس محمد:
- محمية طبيعية في شرم الشيخ الناس بتروح ليها من كل مكان في العالم عشان يعملوا دايفنج وسنوركلينج فيها.
- تقدر هناك تنزل في كامب من الكامبات بخيمتك أو خيمة الكامب وتستمتع بمنظر المياة الصبح ونجوم السماء بليل.
رأس شيطان:
- هى واحده من أجمل وأهدي الأماكن اللى ممكن تفصل فيها كم يوم على البحر مباشرة بعيد عن كل الدوشة،
- والمكان ده لمحبين الأستجمام والهدوء فقط والمنطقة خالية من الفنادق كامبات بس، والأسعار هناك رخيصة مقارنة بين باقي مناطق البحر الأحمر.
نويبع:
- بتقع ما بين دهب وطابا، وبتتميز بأماكن الشعب المرجانية والشواطئ الرملية هناك، تقدر بخيمتك تروح هناك وتستمتع بجمال البحر بالنهار، وبليل بقى تشوف النجوم برؤية واضحة جدا.
الصحراء الغربية
- هنروح الصحراء شوية وهنبدأ بمكان مش واخد حقه فى السياحة.
سيوة:
- واحة سيوة من أجمل الواحات في مصر، وده بيرجع لتاريخها الأمازيغي، وأثار الحضارات القديمة المختلفة في الواحة،
- وكمان طبيعتها الصحراوية الخلابة، تقدر هناك تخيم جوه كامب في سيوة، أو أنك تطلع بحر الرمال العظيم وتخيم في قلب الصحراء بفندق المليون نجمة.
الواحات الداخلة والخارجة:
- من الأماكن المغمورة لمعظم الناس، برغم إنك حرفيا ممكن تخيم هناك ومش هتلاقي حد غيرك، والوسيلة اللي هتخليك تروح هناك هى عربية دفع رباعي، ويفضل تكونوا مجموعة عشان تقسم التكلفة عليكم.
الصحراء البيضاء:
- هى محمية طبيعية فريدة من نوعها في العالم كله، هناك هتشوف عجايب تدهشك، ليلة هناك كفيلة ترجعك بطاقة عالية جدا،
- وعشان تروح هناك محتاج عربية دفع رباعي وتصريح دخول، ودى الدليل اللى هيكون معاك هيساعدك تعمله.
الواحات البحرية:
- هى اخر مركز في محافظة الجيزة، وهناك ممكن تخيم بالقرب من غابات النخيل، أو إنك تخيم في الصحراء السوداء اللي كانت في يوم من الأيام منطقة بركانية، وعشان توصلها لازم عربية دفع رباعي.
وادى الريان:
- بتقع في محافظة الفيوم، ومن أفضل الأماكن اللى ممكن تخيم فيها في مصر، وده لأنك تقدر تشوف من هناك مجرة درب التبانة والنجوم بوضوح جدا، وكمان تشوف الشلالات الشهيرة هناك.
أسوان:
- مؤخرا أصبح في أسوان كامبات تقدر تنزل بخيمتك فيها، وتستمتع بوجودك في خيمة على جزيرة في وسط النيل.
وادي دجلة:
- مكان موجود جوه القاهرة بالقرب من المعادي، اللي تعتبر المتنفس الصحراوى الوحيد لأهل القاهرة، وتقدر تخيم هناك ليلة كاملة هادية بعيدا عن الدوشة.
تابعونا ومتنسوش تشوفوا باقى مقالتنا عن التخييم والهايكنج في مصر.
أقرأ ايضاً:
