فى 26/6/2017 اكتشف محمود الجمل طريق آمن لصعود قمة جبل أم طراطب، وكان بصحبة الدليل البدوى سالم إبراهيم، واحنا ناقلين المعلومات اللى فى المقال ده على لسانه.
جبل أم طراطب
جبل أم طراطب موجود فى سيناء بمنطقة سانت كاترين، الجبل ده مفيش أى توثيق على إن فى مستكشف طلع لقمته بأستثناء السكان المحليين ولكن لم يتم توثيق اى معلومات عنه قبل ما محمود الجمل يعمل كده.
ارتفاع قمة جبل ام طراطب هو 2255 متر فوق سطح الأرض، والمسافة مابين قاعدة الجبل وقمته حوالى 10 كيلومترات.
مدخلين جبل أم طراطب
فى مدخلين ممكن تستخدمهم لتسلق الجبل:
- المدخل الأول هو ال butterfly approach – ultralight، وده فيه انت بتطلع للقمة وتنزل للقاعدة للتخييم أثناء النهار.
- والثانى هو combination between butterfly and full backpack، وده فيه بيتم التخييم أثناء تسلق الجبل فى أماكن غير مجهزة للتخييم،
- وبتطلع بشنطة وزنها من 6 ل 8 كيلو وبعد كده بترجع لنقطة التخييم تانى، والمدخل التانى هيسمحلك تخلص مهمة الجبل فى يومين.
الطريق لقمة الجبل فيه حوالى 60% منه مشى بانحدار مرتفع وحوالي 40% Scrambling وده هتستخدم فيه ايدك ورجلك عشان تتسلق الجبل.. أما عن كمية المياة المستخدمة أثناء الصعود لو هتطلع بأستخدام المدخل الأول هيكون عدد 3 لتر مياة، أما المدخل التانى هتحتاج من 6 ل 8 لتر مياه، وفى بير مياة واحد فقط فى عند نقطة التحرك عند جنينة زواتينة.
الطريق لجبل أم طراطب
- هتركب سيارة 4×4 أو ربع نقل من مدينة سانت كاترين لوادي زواتينة وهتقطع حوالي 32 كم فى 3 ساعات.
- بعد كده هايكنج من وادي عجوص إلى وادي رمحان لمسافة 5 كم فى 4 ساعات.
- ومن وادى رمحان إلى وادى إسلاء بمسافة 8 كم فى 3 ساعات بالجمل أو هايكنج.
- ومن وادي إسلاء إلى مدخل وادى إسلاء حوالي 25 كم فى 6 ساعات بالجمل أو هايكنج.
- وأخيرا من مدخل وادي إسلاء لمدينة الطور بمسافة 30كم بعربيات دفع رباعي.
أفضل وقت لصعود الجبل
من شهر أكتوبر إلى ديسمبر، ومن إبريل إلى مايو.. قبل ما نختم المقالة وجب التنويه على إنه مهما كانت درجة احترافك مينفعش تطلع الجبل لوحدك ولازم يكون معاك دليل بدوى من أهل القبائل المحلية بسيناء، ودول هيكونوا من قبيلة الجبالية أو أولاد سعيد بالنسبة لجبل أم طراطب.
أقرأ ايضاً: