احنا مين

حسك تايه كدة و مش عارف انت هنا ليه و بتعمل ايه بس مبسوط بوجودك و حابب تكمل معانا و حقك علينا تعرف احنا مين و بنعمل ايه بظبط .

بص في خلاصة عاجلة احنا هنا بنبيع تجربتنا ليك و متستغربش المصطلح !!

مدام مكمل معانا لحد هنا يبقى نستفيض في الشرح و ناخد راحتنا

– احنا مجموعة شباب عاشقي للمغامرات و الاستكشاف و الرحلات غير التقليدية و يجمعنا حب التخييم و الترحال في ارض الله.
الفكرة جت ازاي بقى ؟!

– ‏احنا علشان نطلع مغامرة لازم ادوات و معدات زي شنط و خيم و بعض الأدوات اللازمة ، كنا بنتعب علشان نقدر نوفر ابسط الحاجات الأساسية و نلف كتير و نشتري اونلاين من برا مصر و و لفه كبيرة .

– ‏صحيح نسينا نقولك الفترة دي كانت في آخر 2015 و اول 2016 مكانش في رفاهية اختيار المنتجات الأساسية ولا البرندات العالمية مهتمة بالسوق المصري يعني القصد قبل ما برندات متخصصه تفتح في مصر في أواخر 2018 كان الأمر عناء حقا .

– ببساطة قدرنا في أواخر 2016 نوفر المنتجات الأساسية زي ( الشنط – الخيم – بعض المعدات البسيطة من ادوات النار و البقاء)
-‏ بس كان لينا شرط و ما زال، و دا بيأخرنا شوية ايه بقى الشرط !!

-‏- ‏لازم نجرب كل موديل جديد من اي فئة ونختبره قبل عرضه و اذا كان بالجودة المطلوبة نبدأ نعرضه .

– و بدأنا نستخدم الأدوات بعدها نعرضها على اصدقائنا في الجروب و يستخدموها و يقولوا رآيهم بعد كدة نبدأ نبيع للأصدقاء و اصدقاء الأصدقاء المقربين و الحمدلله نولنا رضاء اكتر من 4000 مغامر و رحال سافروا و استخدموا ادواتنا في سفريات داخل مصر و خارجها .
-كل دا احنا شغالين على جروبس و لا يوجد صفحة مستقلة خاصة بنا لمدة اكثر من عام و تقارب العامين .

-اصدقائنا اقترحوا علينا لازم نعمل صفحة علشان تجمع كل منتجاتنا و عملائنا و المهتمين و بالفعل اخدنا القرار لكن متأخر شوية في نوفمبر 2017 و كطبيعة الحال بنطور، لحبنا و شغفنا بالهواية .
– و قولنا ليه منطلعش الاصدقاء و المغامرين اللي اشتروا مننا رحلاتنا الاستكشافية طبعا بعد ما نستكشف المكان و نخطط ليه كويس و نزوره اكتر من مرة علشان تكون جودة تنفيذ الرحلة اكثر احترافية بدأنا بالفعل و كانت البداية في 2018 رحلة لمثلث حلايب و شلاتين و صحراء الجنوب الشرقي لمصر .
المناطق اللي هتذكر دي احنا روحناها اكتر من مرة و دارسينها كويس لخطورة تنظيم و ترتيب رحلات للمناطق دي لصعوبة شبكة المواصلات و الانتقالات و احيانا صعوبة التواصل لعدم وجود شبكات محمول و اتصالات .

-روحنا و زرنا و رتبنا رحلات لي ( مثلث حلايب و شلاتين و جبل علبه – مرسى علم و وادي الجمال – مدينة الاشباح جوست سيتي بسفاجا – القصير – دهب ابو جالوم و بير العقدة – محميتي راس محمد و نبق و منطقة سراييط الخادم – سيوة و جارة ام الصغير و “الوحيدين في مصر اللي نفذناها لمصرين ” كرحلة ل40 فرد – النوبة القديمة و جزيرة هيسا و معبد كلابشة – الواحات البحرية و كهف الجارة ) نقفل القوس على كدة و دي الرحلات اللي نفذناها خلال عامين مع مغامرين بالفعل مش رحلات احنا طلعناها كستكشاف بس دي اتنفذت و في فرق كبير بين الاتنين
– بنسعى نخلي كل المغامرين يلفوا مصر شبر شبر علشان كدة تقريبا رحلاتنا بتكون غير متكررة الا نادرا يهمنى نزور و نغطي كل مصر .
– بعد ما استكشفنا اغلب مصر لان حقيقي محدش لف او يقدر يقول انا لفيت مصر كلها مصر مبتخلصش
– ‏- ‏بنرتب لمناطق جديده قليل اللي بيعمل فيها رحلات مناطق زي ( الوادي الجديد و درب ال 40 و واحة باريس – لفة مختلفة في سينا – مطروح و العجارة – صعيد مصر – ما وراء السد و بحيرة ناصر اسوان – البرلس – رشيد – بور سعيد – لفة في الدلتا ) و ممكن تقترحوا حابين تروحوا فين الفترة الجاية .

صحيح احنا اغلب رحلتنا تخييم او فنادق متواضعة تكفي لغرض النوم لاننا اغلب اليوم برا بنستكشف ميهمناش مستوى الرفاهية اهم حاجة يكون على المستوى الآدمي فقط و طبعا بنكون مجربينه لتجنب اي مشاكل مسبقاً .

احنا في شنطة رحالة بنبني مجتمع رحالة و ندعمه بكل ما نملك 💓