كل حاجة عن أعلى قمة جبل بالبحر الأحمر.

      – كل حاجة عن أعلى قمة جبل بالبحر الأحمر.

المقال ده احنا ناقلينه عن ملك الدروب محمود الجمل، اللى من قلائل الرحالة اللي طلعوا الجبل ده نظرا لصعوبته وخطورته.

جبل شايب البنات هو أعلى قمة جبل بين سلسة جبال البحر الأحمر بأرتفاع 2187 متر من سطح البحر.

سبب تسمية الجبل بالشايب، إن قمته بتظهر باللون الأبيض وكأن الجبل شيخ شعره ابيض.

موقع الجبل بالضبط فى الصحراء الشرقية عند مرتفعات البحر الأحمر ودى إحداثياته.

N 26°58’38.49″ E 33°29’23.33″.

-أما عن دروب الجبل.

الجبل فيه ثلاث دروب، وترتيبهم من الأسهل للأصعب درب أبو عبيد، درب تلاع حسين، درب أبو عرن، ودرجة صعوبة الدرب بيتم تحدديها عن طريق صعوبة نقاط ال scrambling، وال scrambling ده هو إنك بتتحرك ما بين صخور ضخمة وانحدارها بيتراوح ما بين السهل للمتوسط وشديد الصعوبة بأستخدام ايدك ورجلك.

وبما إن الشايب إنحداره مرتفع، ف ده هيخلى الصعود إلى قمة الجبل فى غاية الصعوبة لأن 20% منه بس هى اللى مشى بأنحدار، و 80% الباقيين عبارة عن scrambling بمستوى متوسط بنسبة 60%، وscrambling بمستوى صعب بنسبة 20%.

دلوقتى هنقولك على الطرق اللى تطلع بيها الجبل.

الطريقة الأولى هى ال butterfly approach ultralight، وده انك بتوصل لقمة الجبل وترجع لقاعدة التخييم فى نهار واحد وبتشيل أحمال من 6 ل 8 كيلو لمسافة تصل إلى 1300 متر لعدد ساعات متواصلة تصل إلى 12 ساعة فى طرق غير ممهدة بأنحدارات مرتفعة.

الطريقة التانية هى ال full backpack approach، وده فيه إنت بتكون شايل شنطتك كاملة وبتطلع بيها لقمة الجبل، والطريقة دى بتسمح ليك بالتخييم فى الجبل، فى أماكن غير مجهزة للتخييم.

أما عن كمية المياه أثناء الصعود.

-لو هتطلع الجبل بأستخدام طريقة ال butterfly approach ultralight ف انت محتاج 3 لتر مياة للصعود إلى قمة الجبل بمسافة 11كم بعدد من 7ل9 ساعات متواصلة.

-أما لو هتطلع بأستخدام طريقة ال full backpack approach ف أنت هتحتاج 8 لتر مياة للصعود لمسافة 11كم لمدة من 10 ل 12 ساعة، وللأسف لا يعتمد على مياة الآبار، ويتم الأخذ في الأعتبار كمية مناسبة من المياة المعدنية.

-ازاى تروح لقاعدة الجبل.

هتركب من الغردقة إلى مخيم أم ضلفة مسافة 35كم سيارة ربع نقل 4×4 والطريق هياخد 3 ساعات.

أخيرا مينفعش مهما كانت درجة احترافك انك تطلع لوحدك لازم يكون معاك دليل بدوى من قبيلة المعازة، ودول هم أهل البلد المحليين فى منطقة جبل الشايب.

رحلة سعيدة..

اترك تعليقاً

لن يتم نشر عنوان بريدك الإلكتروني.

القائمة